कैलाली । धनगढी उपमहानगरपालिकाले पत्रकारलाई समाचार संकलनमा अवरोध गरेको बिषयमा स्वयम पत्रकारले घटनाको छानबिनको माग गरेका छन् ।
अनलाइन खबरमा कार्यरत पत्रकार जनक बिष्टले आज पत्रकार महासंघ कैलालीलाई घटनाबारे छानबिनको माग गर्दै निवेदन पेस गरेका हुन् । असार २७ गते बसेको धनगढी नगर सभाको बैठकमा बिस्टलाई पाखुरा समातेर बाहिर निकालेको भन्दै पत्रकार महासंघ कैलाली सहित विभिन्न पेसागत संघ संस्थाहरूले विज्ञप्ति जारी गरेका थिए । तर, घटनाको ४ दिन पछि धनगढी उपमहानगर पालिकाले विज्ञप्ति जारी गर्दै उक्त विषयको खण्डन गरेको हो ।
हिजो नगरपालिकाकाका प्रमुख प्रशासकीय अधिकृत रामलाल श्रेष्ठले जारी गरेको बिज्ञप्तिमा उक्त दिन कुनै पनि पत्रकारलाई ननिकालिएको प्रस्ट पारेका छन् ।
यसैबिच पत्रकारले दिएको अभिव्यक्ति र नगरपालिकाको विज्ञप्ति बाझिएपछि बिष्टले छानबिनको माग गरेका हुन् ।
उपमहानगरपालिकाको दाबीअनुसार घटना नभएको र अनावश्यक रूपमा आफूले अतिरञ्जित गरेको देखिएमा आफूमाथि समेत छानबिन गरी कारवाही गर्न उनले माग गरेका छन्
उनको निवेदन पाए लगत्तै महासंघले पनि यस बिषयमा चासो देखाएको छ । घटनाको सत्य तथ्य छानबिन हुने पत्रकार महासंघ कैलालीका अध्यक्ष हिमाल जोशीले बताए ।