१३ जेठ, काठमाडौं । बाजुराको बुढीगंगा नगरपालिकाको निर्वाचन विवाद अदालतमा पुगेको छ ।
एमालेले उच्च अदालत दिपायलमा मतगणनाको माग राखी दिएको निवेदनमा दुवै पक्षलाई छलफलका लागि डाकिएको छ । निर्वाचन आयोगले फेरि मतदानको निर्णय गरेपछि सर्वोच्च अदालतमा समेत रिट निवेदनको तयारी भएको छ ।
३० वैशाखमा निर्वाचन भएपछि बुढीगंगाका निर्वाचन अधिकृतले मतगणना गर्ने वा फेरि निर्वाचन गर्ने भन्नेवारे निकास दिन निर्वाचन आयोगमा पत्राचार गरेका थिए । त्यसपछि उनी फिर्ता भए । निर्वाचन आयोगले स्थलगत टोली पठायो ।
निर्वाचन आयोगले बिहीबार नै बाजुरामा फेरि मतदान गर्ने निर्णय ग¥यो । निर्णय विरुद्ध एमालेले सर्वोच्च अदालतमा कानूनी उपचार खोज्ने तयारी थालेको छ । ‘त्यो निर्णय विरुद्ध बुढीगंगा नगरपालिकाका मतदाता सर्वोच्च अदालत जाने तयारी छ’, एमाले बाजुराका नेता कर्ण थापाले भने, ‘आफूले व्यक्त गरेको मत गणना नभई खेर जाने र फेरि मतदान गर्ने काम स्वीकार्य हुँदैन । मतदाताले कानूनी उपचार खोज्छन् ।’
निर्वाचन सकिएको दुई साता वितिसक्दा पनि मतगणना नभएको भन्दै एमालेका मेयर उम्मेदवार राम बहादुर बानियाले उच्च अदालत दिपायलमा निर्वाचन अधिकृतको कार्यालय र मुख्य निर्वाचन अधिकृतको कार्यालयबिरुद्ध मुद्दा दायर गरेका थिए । रिट निवेदनमाथि प्रारम्भिक सुनुवाई गर्दै उच्च अदालतले दुवै पक्षलाई छलफलका लागि बोलाएको छ ।
बाजुरामा एमाले र कांग्रेसले एक अर्कामाथि बुथ क्याप्चरको आरोप लगाएका छन् । कांग्रेसले दुईवटा वडामा बुथ क्याप्चर गरेको एमालेको आरोप छ । एमालेले ४ वटा बुथ क्याप्चर गरेको कांग्रसको आरोप छ ।