धनगढी,१२ माघ । कैलालीको गेटामा बस र म्याजिक एकआपसमा ठोकिएका छन् । आज शुक्रबार साझ गोदावरी नगरपालिका ५ मनहेरा पुल नजिक विपरित दिशाबाट आइरहेका बस र म्याजिक ठोकिँदा ९ जना घाइते भएका छन्
धनगढीबाट अत्तरिया तर्फ गइरहेको सुदूरपश्चिम यातायात प्रालिको ना ४ ख ७२३० नम्बरको बस र अत्तरियाबाट धनगढी तर्फ आउदै गरेको से १ ज ३५४ नम्बरको म्याजिक एकआपसमा ठोकिएर दुर्घटना भएको जिल्ला ट्राफिक प्रहरी कार्यालय कैलालीका प्रमुख दिपक मल्लले जानकारी दिए । दुर्घटनामा परि घाइते १ जनाको अवस्था गम्भीर, ३ जनाको मध्यम र ५ जनाको अवस्था सामान्य रहेको मल्लले जानकारी दिए ।
घाइतेहरुको धनगढी स्थित माया मेट्रो र नबजिन अस्पतालमा उपचार भइरहेको छ ।टाउकोमा चोट लागेका बैतडीको दशरथ चन्द नगरपालिका ११ का १८ बर्षिय सन्तोष भण्डारीको अवस्था गम्भीर रहेको छ । टाउको,अनुहार र दुबै खुट्टामा चोट लागेका म्याजिक चालक धनगढी ३ का ४० बर्षिय धर्म साउद, खुट्टामा चोट लागेका डोटी जोरायल गाउँपालिका १ का २७ बर्षिय राजन बिक र भित्रि चोट लागेका धनगढी ४ का ४५ बर्षिय अम्मर बि.कको अवस्था मध्यम रहेको छ ।
डोटीको जोरायल गाउँपालिका १ की सोनु बि.क, यसोदा मुन्नी,गोदावरी नगरपालिका २ का प्रदेश चौधरी,चुरे गाउँपालिका १ का कृष्ण साहु र गौरी गंगा नगरपालिका ९ का दिनेश बोहराको अवस्था सामान्य रहेको मल्लले जानकारी दिए ।
बस चालक धनगढी उपमहानगरपालिका वडा नम्बर १७ का करन बोहरा र बसलाई नियन्त्रणमा लिई इलाका प्रहरी कार्यालय मालाखेतिमा राखि थप अनुसन्धान भइरहेको मल्लले जानकारी दिए ।