धनगढी ,१२ माघ ।बैतडीका एक वडा कार्यालयका कार्यालय सहयोगी मृत फेला परेका छन् । मेलौली नगरपालिका-८ कोटिगाँउका कार्यालय सहयोगी लक्ष्मण सिंह विष्ट शुक्रबार मृत भेटिएका हुन् ।
आज बिहान उपचारका लागि धनगढी जान्छु भनी हिँडेका उनी सोही वडाकै हरडा खान धर्मशालाको उकालो बाटोमा मृत फेला परेका जिल्ला प्रहरी कार्यालय बैतडीका प्रवक्ता नन्दराज जोशीले बताए ।
मृतक विष्टको पारिवारिक स्रोतका अनुसार उनी प्रेसर र सुगर रोगबाट ग्रसित थिए । उनको शव मेलौलीको केशरपुर प्राथमिक स्वास्थ्य केन्द्रमा राखिएको र पोष्टमार्टमपछि आफन्तको जिम्मा लगाइने प्रवक्ता जोशीले बताए।