धनगढी, १८ पुस । कैलालीको गोदावरी नगरपालिका–४ बेलपानी, फुलबस्तिमा विद्युत लाइन विस्तार गरिएको छ । गोदावरी नगरपालिकाका प्रमुख विरेन्द्र भट्टले एक कार्यक्रमका बीच मंगलबार विस्तार गरिएको लाइनकोे उद्घाटन गरेका थिए ।
कार्यक्रममा बोल्दै भट्टले आफ्नो डेढ वर्षको कार्यकालमा विद्युत विस्तार गर्न सफल भएको बताए । विद्युत सेवा विस्तार भएपछि त्यहाका फुलबस्ति, पटयानी, दामोदरे, तल्लो गैरी, मल्लो गैरीका स्थानीयले उपभोग गर्न पाउने भएका छन ।
उनले भने, लामो समयदेखि अँध्यारोमा रहेको बस्ती उज्यालोमा आएको छ । छोटो समयमै विद्युत ल्याउन सफल भएका छौ’ उनले फुलवस्ती, पटयानी, तल्लो गैरी, मल्लो गैरीका २ सय परिवारको घरमा विद्युत पुगेकाले अब छिटै बेलपानीका परिवार बसोबास गर्ने फूलबस्तीमा विद्युत विस्तार गरिने बताए ।
उनले नगरका सबै ठाउँमा विद्युत विस्तार गर्नको लागि अझै १५–२० विद्युत पोल आवश्यक पर्ने बताए । कैलालीको गोदावरी नगरपालिका वडा नं ४ को फुलबस्ति, पतकानीमा बाटोघाटो, बिजुली, खानेपानी, सुरक्षित स्वस्थ्य, सञ्चार सेवा बाट टाढा लगायतका समस्या देखिएका छन् ।
गोदावरी नगरपालिका सुगम पालिका भएर पनि यस क्षेत्रका जनताले सहज रुपमा विद्युत सेवा उपभोग गर्न पाएका थिएनन् । ११ केभी विद्युत लाइन बिस्तार भएपछि सहज हुने वडा अध्यक्ष हेम प्रकाश मल्लले बताएका छन् ।